TRAMU TRESMONTANU DEL CAMIN DE LOS ASTURES

 

 

CASTRUS TREMONTANUS

CASTRU’L CADU

La Mortera, Candamu (Asturies)

Cuentan los vecinos ya vecinas de La Mortera que los per vieḷḷus del pueblo alcordabanse de güeyar los corrus ya las murias del Castru Cado, tamién alcuerdanse de J. M. Gonzalez cuandu tuvo nos años sesenta, a finales, a visitar el poblau fortificau, alcuerdanse de los dos fosus escavaus nel espolón de caliza au s'asienta la fortificación, onde taba l'entrada p'engaramase nel Picu'l Cado como tamien lo nomaban. Poro enantes vienu'l golpe d'estau franquista ya'l aprovechamientu de las murias pa facer trincheras ya nidos de ametralladora ya emplazamientus de cañones.

Esti castru tien munchu d'especial, aparte del control visual de los rios, tá nas ḷḷindes de Pésicos ya Ḷḷugones, dende equí parte'l Camin que vá pela Cava a los Ḷḷanos, al Castru'l Pedreru ya'l Castru La Forcá, na Cabruñana ya que llueu enllaza col Camin de la Mesa, al mio paecer ye'l mesmu camin.

CASTRU’L PEDRERU

La Cabruñana, Grau (Asturies)

Tien muncha hestoria esti enclave, los derumbes que se güeyan nas semeyas foron provocaos ena mayor parte por ḷḷalgueiros buscadores de tesoros, dalgunos con explosivos.

El castieḷḷu medieval tá feichu so un castru más vieyus ya esti so un asentamientu probablemente de l'Edá de Bonce, como caltienen los últimos trabayus con xeoradar que se ficieron fai poucu tiempo. Queda ún ablucau colos sistemas defenxivos que tien tres fosus enormes paralelus con contrafosu, poro que fueron modificaus na Edá Media.

Nota: so l'Edá de Bronce: ye hipotéticamente posible per la cercania del Castieḷḷu colos Túmulos de La Cueña, nun hay namás que 200 metros ente un enclave ya'l outru.

CASTRU’L FABEIRU

Viḷḷandás, Salceu, Grau (Asturies)

Tamos en un castru de los grandinos, 86 metrus nel llargor per 43 metrus nel anchor, ta enforma complicau la ḷḷegada a la ubicación, el camin nun ḷḷega fasta eḷḷí, ya hay que saltar matus ente los praus.

 

Las murias que atopamos nesti ḷḷugar nun son murallas non, tan arruinaes per completu, ya utillizaes pa las ḷḷindes de los praus, poro asína y tou vense per bien los sistemas defensivos, fosus ya contrafosus ya un desnivel nel terren feichu pela manu del humano. Agora sí, los campos visuales que tien El Fabeiru col Camin de la Mesa ye de casi 160 graus.

CASTRU D’ONDES

Ondes, Miranda (Asturies)

Queda ún ablucau cuando agüeya'l Castru d'Ondes, ye impresionante el sistema defensivo que tien la fortificación, tres fosus con dos contrafosus, más llueu outru escavau na roca, tien un llargor per importante 126 metros por 48 d'anchor, tá nún sistema de doble terraza metá caliar metá pizarra, tá orientau nor-noreste-sur-suroeste. Poro lo que más presta ye'l l'entrá del castru, tien un sistema de llaberintu escavau na piedra qu'abluca, en parte tá desfeichu per una caxa nueva del camin d'acesu a l'allugamientu. Per rematar l'apunte, tien forma ovalá.

CASTRU VIGAÑA ARCEU

Vigaña Arceu, Miranda (Asturias)

El Castru ye un enclave castrañu allugau nún crestón caliar a lo fondeiru del vaḷḷe del Pandu, Vigaña, tá orientau Este-Oeste. Pela pendiente cuerren dos fosus per definios uno curtiu yal outru algu mayor que tornan l'acesu a la fortificación. Tien forma oval ya notase'l sistema aterrazau del recintu, cola de perriba bien sufitá pela muraḷḷa, una muraḷḷa de alrodiu los cuatru metros. Nos años 90 ficieronse delḷḷos sondeos arqueolóxicos que yos dieron bonos resultaus, restus oseos de fauna, cerámicas, escorias, ya piezucas de bronce, un área doméstica, ya un ḷḷugar de trabayu metalúrxicu. Anque nun ye'l castru meyor defendible si ye de los más definios en cuantu a las muraḷḷas ya fosus. Per guapu.

CASTRU LA COGOḶḶINA

Castru, Teberga (Asturies)

Güei amuesovos un complexu castreñu per completu.

Tamos nel Castru La Cogoḷḷina, Teberga (Asturies). La Cogoḷḷina ya un espoĺon terren na zona la Sierra Medión (¿Meduliu?). Tien forma ovoide algu más plano na zona d'acesu. Eḷḷi tan allugaos dos fosus per grandes con un contrafosu. Ye un sistema multiterrazas con pelo menos dos murallas vien deifinias fechas con bloques de pizarra (Zona Carbonifera, per baxu van las capas de carbón de la vieya esplotación hullera). Con un llargor considerable cientu cuarenta y seis metros per cincuenta y nueve d'anchor. Caltiense entobia'l bastión del acesu que fai enforma contraste colos fosos. Notanse per bien la zona habitacional con corrus (dalgún d'eḷḷos saqueaus) nos aún conservan las murias de las sos paredes. Nel añu 2006 ficieronse d'ḷḷos sondeos (Fanjul) nelos que dieron resultau positivo con restos de carbones, ceramicas fechas a mano datandose cronoloxicamente nel sieglu IV Enantes de la Nuesa Era. D'esi informe sal a rellucir qu'el castru foi abandonau per esa época.

Entamamos pel camin que vá dende La Cogoḷḷina (Castru) pa los Puertus de Marabiu, ye algu pindiu poro non malo, a quinientos metros hay un pradin averau a la manzorba, saltamos el zarru ya llueu saltamos el del castañeu, caminamos cincuenta metros ya topamos la primera marca del yacimientu, tratase d'una muria perriba dún espalón de pizarra que fai las veces de primera defensa deseguio atopamos un fosu, nun muy pronunciau, ya vense nél las murias del torrexón. Tien forma rectángular, con unas medies de 49 metros de llargor per 28 metros d'anchor, tien orientación Norte-Sur ya foi catalgau per J.M. Gonzalez n'alrodiu de 1962.

En ḷḷegando a esti allugamientu, lo primeru que se nota ye'l grau de sedimentación que tien, abonda no, más, por decir que l'único que se nota son los restos de las murias de los torrexones que tán nas esquinas. Tien el meyor campu visual d toes las fortificaciones del Camin de la Mesa na parte tresmontana, pué apreciase meyor nel siguiente vidiu.

CASTRU LA GARBA

Berrueñu, Carrea, Sorviḷḷa. Teberga (Asturies)

El poblau astur de La Garba tá na falda de la Sierra de Sobia, tá catalogau per J.M. Gonzalez nos años 70 del sieglu pasau. Tien fortificaciones con murallas de modulos, el primer fosu tá enforma separau del castru, güei ye mediu camin media reguera. Ficieronse dellos sondeos nel 2005 (Fanjul) au s'atoparon dalgún enser de l'adá del fierru, ya tamién rexistraronse obxetus de l'alta edá media. Tien orientación Noroeste-Sudeste con forma oval algu enanchada na entrá del recintu, au s'aprecia l'outru fosu. El llargor ye de ciento treinta seis metros per setenta y dos d'anchor.